Pejabat Teras

Rumangsa urip ket cilik nganti tuwa dadi wong desa, kepaksa urip nang kota krasa banget sengasarane awak. Nek ana sing ngomong kejamnya ibu tiri tak sekejam ibu kota kayane sering krungu. Tapi dirasakna temenan ya nembe siki.

Pertama ngambah Jakarta wis dilomboni wong. Takon alamat malah disasar-sasarna. Takon tukang ojeg dijujugna mubeng-mubeng adoh banget nganti mbayare larang. Ora ngertia nek dilakoni mlaku be sepuluh menit tekan. Dolan nggone Kang Khamshe mangkate sejam tekan, baline 4 jam nembe nemu dalan sing bener.

Wis kaya kue diweden-wedeni ora olih udud sembarangan. Jere nang Jakarta nek udud dicekeli. Lah jarku nangdi-ndi udud ya dicekel. Nek diglethakna ya jenenge obat nyamuk. Kalingane temenan kuwe. Lagi penak-penak udud dioyok-oyok hansip.

Wis genah posisine dadi pegawe Yahoo sing ndina-ndina nongkorong ngarep komputer. Paling nylekamin mbok dikancani seciduk kopi (asline sih segelas, tapi bola-bali ngejog) karo sebatang samsu tapi ora tau leren. Dudu masalah ra ngerti kesehatan, tapi daripada tuku obat nyamuk disuled trus dijorna sematine, ya mending tuku ududan. Dikenyot disit nembe disebulna go ngurak lemud. Nek lemude urung mati, gari dioyok trus bambane ditunyukna. Yakin ampuh. Kur pancen bingung, soale siki jamane obat nyamuk semprot karo elektrik. Apa enggane kudu ganti ngemut baigon apa colokan listrik?

Mbalek soal gawean...

Nang Jakarta pegaweane pada bae, udud karo udud. Tapi nembe ngglethakna bungkus rokok wis diomong. "Mas, ruangan AC..."

Walah, sengsara temen dadi pegawae nang kota. Pengin udud be angel, kudu dadi pejabat disit. Truse aku usul meng juragane kon didadikna pejabat teras nang perusahaan dengan alasan demi peningkatan produktivitas.

Alhamdulillah juragane ngerti pentinge peningkatan produksi. Usulku ditampa, diangkat dadi pejabat teras temenan. Diwei ruangan nang lantai papat nduwur dewek sing biasane go memeni klambi nek ruko kuwe dienggoni wong umah-umah. Ora urusan nek sore kepanasan sing penting bisa udud dengan nyaman, aman dan terkendali.

Pancen penak dadi pejabat teras...

Klepusss....